Psalms 106

1Dumisani uJehova. Bongani uJehova, ngokuba ulungile; uthando lwakhe lumi lanini.

2Ngubani ongamemezela imisebenzi emikhulu kaJehova loba atsho ngokugcweleyo udumo lwakhe na?

3Babusisiwe labo abahlala besenza ngendlela enhle, abahlezi besenza okulungileyo.

4Ungikhumbule, Jehova, nxa usuveza umusa ebantwini bakho, woza ungisize nxatshana usubasindisa,

5ukuze lami ngikholise ukuphumelela kwalabo obakhethileyo, ukuze ngabelwe entokozweni yesizwe sakho ngihlanganyele lelifa lakho ekudumiseni.

6Sonile, njengalokho abakwenzayo okhokho bethu; senzile okubi senza izinto ezimbi.

7Lapho okhokho bethu beseGibhithe, kabayinakanga imimangaliso yakho; kabazikhumbulanga izenzo zakho zomusa ezinengi, bahlamuka bengasolwandle, uLwandle oluBomvu.

8Kodwa wabasindisa ngenxa yebizo lakhe, ukuze amandla akhe amakhulu aziwe.

9Walukhuza uLwandle oluBomvu, loma qha; wabahola badabula ezinzikini njengasenkangala.

10Wabasindisa esandleni sesitha; wabahlenga esandleni sesitha.

11Amanzi asibekela izitha zabo, kakho loyedwa wazo owasindayo.

12Lapho-ke base bezikholwa izithembiso zakhe bahlabelela indumiso yakhe.

13Kodwa baphanga bakukhohlwa lokho ayekwenzile kabaze balindela ukweluleka kwakhe.

14Enkangala bakhulelwa yizinkanuko zabo; khona emqothwini bamlinga uNkulunkulu.

15Ngakho wabapha lokho abakucelayo, kodwa wabathela ngomkhuhlane ocikizayo.

16Ezihonqweni basuka baba lomhawu loMosi njalo lango-Aroni, owayengcwelisiwe kuJehova.

17Umhlaba wavuleka waginya uDathani; wagqibela ixuku lika-Abhiramu.

18Umlilo walavuza phakathi kwabalandeli babo; ilangabi lababhebhisa ababi.

19EHorebi benza ithole, bakhonza isithombe esenziwe ngensimbi.

20Badela ukuKhazimula kwabo bakhetha isithombe senkunzi edla utshani.

21Bakhohlwa uNkulunkulu owabasindisayo, owayenze izinto ezinkulu eGibhithe,

22imimangaliso elizweni likaHamu lezenzo ezibabazekayo ngasoLwandle oluBomvu.

23Ngakho wathi uzababhubhisa – aluba kungesuMosi, owakhethwayo wakhe, owema phambi kwakhe ukuvalela ulaka lwakhe ukuze angababhubhisi.

24Kwathi njalo baleyisa ilizwe elihle; kabasikholwanga isithembiso sakhe.

25Bakhonona besemathenteni abo kabaze bamlalela uJehova.

26Ngakho wafunga kubo ephakamise isandla sakhe ukuthi wayezabenza bafele enkangala,

27enze izizukulwane zabo ziqedwe ngabezizwe zihlakazeke emazweni wonke.

28Bazibopha ingathi kusejogweni kuBhali wasePhewori badla imihlatshelo eyayinikelwe kubonkulunkulu abangaphiliyo;

29bamthukuthelisa uJehova ngezenzo zabo ezimbi; kwavela isifo phakathi kwabo.

30Kodwa uFinehasi wema wancenga isifo sadeda.

31Lokhu kwenza kuthiwe wayelungile kwaziswa izizukulwane zonke ezizayo.

32Bamzondisa uJehova ngasemthonjeni weMeribha, uhlupho lwase lusehlela uMosi ngenxa yabo;

33ngokuba bahlamuka uMoya kaNkulunkulu, uMosi waze wakhupha amazwi amabi ngezindebe zakhe.

34Kabababhubhisanga abantu bezizwe njengalokhu ababekulaywe nguJehova,

35kodwa baphithikana labezizwe bathatha imikhubo yazo.

36Bakhonza izithombe zazo, kwaba yisithiyo kubo.

37Benza imihlatshelo ngamadodana abo lamadodakazi abo kumadimoni.

38Bachitha igazi elalingelacala, igazi lamadodana lamadodakazi abo, abenza ngabo imihlatshelo yezithombe zaseKhenani, ilizwe langcola ngegazi labo.

39Bazingcolisa ngalokho abakwenzayo; ngezenzo zabo baziphatha njengeziphingi.

40Ngakho uJehova wabathukuthelela abantu bakhe wanengwa yilifa lakhe.

41Wabanikela kwabezizwe, izitha zabo zabusa phezu kwabo.

42Izitha zabo zabacindezela zababeka ngaphansi kwamandla azo.

43Izikhathi ezinengi wabakhulula, kodwa babezimisele ukuhlamuka bacikizeka ngenxa yesono sabo.

44Kodwa wananzelela ukuhlupheka kwabo esezwile ukukhala kwabo;

45ngenxa yokubahawukela wakhumbula isivumelwano sakhe, kwathi ngothando lwakhe olukhulu wadeda.

46Wabenza bahawukelwa yibo bonke ababebathumbile.

47Sisindise, O Jehova Nkulunkulu wethu, usiqoqe sibuye kuzo zonke izizwe, ukuze silibonge igama lakho elingcwele sizwe inkazimulo yendumiso yakho.

48Udumo kalube kuye uJehova, uNkulunkulu ka-Israyeli, kusukela phakade kuze kube phakade. Akuthi bonke abantu bathi, “Ameni!” Dumisani uJehova.